دیوانی نوێی شیعره‌کانی سه‌ید کامیل ئیمامی (ئاوات)
نووسین و ئاماده‌کردنی: ئه‌نوه‌ر سوڵتانی
شیعری ژمارە ٢١٥
ڕێگای عیشق
|
بە ڕێگای عیشقدا ڕۆیم بە سەرسەنگی، خەیاڵاوی[1] بە دڵتەنگی، بە بێدەنگی، بە بێ ڕەنگی، بە داماوی لە دەریای قووڵی بیر وخەم دەبێ کەنگێ دەرمبێنن بە ڕەشپۆشی، بە بێهۆشی، بە ناخۆشی، بە خنکاوی دەنا خۆ گەر بسووتێم من بە ئاوری عیشقی یار، ئاخۆ بەڕێز ئەگرن وەکوو هیندوو، برا تەرمم بە سووتاوی؟[2] دەڕۆم بەو ڕێگەدا شەرتە هەتا ماوم بە یادی یار بە هیوای دڵ، بە مەیلی دڵ، دڵێکی گەرم و ئاگراوی کەچی بەو حاڵی بێحاڵم، کە دیتم داوەتە، ڕۆییم[3] بە هیوای بەژنی جوانی یار، کە زوو کەوتوومە نێو داوی بەڵام دەسیان نەگرتم هەرچی هەوڵمدا، گەلی لاوان دەیانگوت پیرە، خاوەن ڕیشە، با بڕوا لە ئاوایی! وەدەرکەوتم، بزەی هات یار بەمن، ئەمنیش بزەم هاتێ لەخۆشیان وەختەبوو بفڕم کە چەل چەل دایدەگرت چاوی بەدڵ خۆم خستە بەرپێی بەڵکە پێ دانێ لەسەر چاوم لەبەر برژۆڵ نەهات، فەرمووی کە سەر چاوێکە دڕواوی ئەمن لاوێکی سوارچاک، تەقڵەباز بووم، ئەوێستاکە[4] کەچی پیرێکی کەوتووم، عومری خۆم دانا بە خۆڕایی "ئیمامی" هەڵگرە دەستت لە هیوا و ئارەزوو و ئاوات[5] بەجارێ تێپەڕی تاف و زەمانی جوانی و لاوی (لاپەڕە ١٧ و ١٨ ی چاپی ئەنیسی. لە دیوانی چاپی جەعفەردا نەهاتووە) __________________________________ بە داخەوە ئەم شیعرە جوانە لە دیوانی چاپی جەعفەر دا نەهاتووە و هەر بۆیەش ڕێکەوتی گوترانی بۆ دیاری نەکراوە بەڵام بە حیسابی ناوەرۆک و ئەوەی بەتایبەت لە فەردی ٩ و ١٠دا هاتووە، دەبێ دوای تێپەڕبوونی تەمەنی لاویی شاعیر گوترابێت. شیعرێکی غەرامییە، بەڵام خۆ کلا کردن و گۆشەگیریی شاعیر لە زوربەی فەردەکان دەردەکەوێت. سەرسەنگی: لاساری، گوێ نەبیسی (هەنبانە بۆرینەی مامۆستا هەژار) بەڕێز ئەگرن: ئایا وەک شتێکی بەڕێز سەیری دەکەن؟ هیندوو: هیندستانی و ئیماندارانی ئایینی هیندوو. ئەوان تەرمی مردووەکانیان دەسووتێنن. کەچی بەو حاڵی بێحاڵم...: ئەم فەردە لە درێژەی فەری پێشتردایە. شاعیر دەیەوێت بڵێ هەتا ماوم بە ڕێگەی عیشقدا دەڕۆم و لەهەر شوێنێک داوەت و شایی هەبێت دەیچمێ بە هیوای دیتنی بەژنی جوانی یار. بەڵام کێشە زەمەنی کرداری "ڕۆیم"ە کە دەبوایە لە دادێدا بگوترێت نەک ڕابردوو. بەڵام دەسیان نەگرتم...: ئەوەش هەر لە درێژەی فەردەکانی پێشتردایە و شاعیری بەتەمەن و بەساڵاچوو بەڵام دڵتەڕ، دەچێتە سەر هەموو شایی و گۆڤەندێک بەڵام لاوان نایبەنە گەڕی داوەتەوە و دەڵێن پیری لێرە بڕۆ! گەلی لاوان: جەماعەتی لاوان چەل چەل: جارجار؛ موکریانییە. لەبەر برژۆڵ...: ئەو تەعبیرە لە شیعری زۆر شاعیری فارس و کورددا هاتووە و ئاواتیش لای کەم جارێک لە چوارینەیەکدا گوتوویەتی: دڕواوی: شتێک کە چقڵی هەیە، خاوەن دڕوو
[1] لە دەقەکەدا وەک ڕۆییم هاتووە. [2] لە دەقەرکەدا وەک هیندو هاتووە. [3] لە دەقەکەدا وەک ڕۆییم هاتووە. [4] لە دەقەکەدا وەک "تەقڵەباز بووم و ئەوێستاکە" هاتووە کە کێشی شیعرەکەی پێ لەنگ دەبێت. [5] لە دەقەکەدا وشەی ئاوات خراوەتە نێوان دوو کەوانۆکەو:"ئاوات" کە ئەگەر وا بکەین ئیهامە نزیکەکە واتە واتای ئارەزوو دەفەوتێت..
|