دیوانی نوێی شیعره‌کانی سه‌ید کامیل ئیمامی (ئاوات)

نووسین و ئاماده‌کردنی:  ئه‌نوه‌ر سوڵتانی

پارچە شیعری ژمارە  ١١٩

تاڵ و سوێری


 
 

کوتم با ڕوو له یار و ئاشنا کەم[1]
که بەشکم دەردی دڵ تۆزێ دەوا کەم

بەڵام یارم نەیار بوو، ئاشناشم
دەڵێ نەمدیوی، ناتناسم براکەم!

که تەوفیریان نییه چ بکەم خودایا
لەگەڵ بێگانه، یاران چۆن جیا کەم؟

که ڕووناکی نییه بۆ من له هیچ لا
له هەر شوێنێ، دەبێ هەر بێم و ڕا کەم

ئەمن هەر تاڵ و سوێریم دی له دنیا
دەبێ کەی بێ خودا ڕۆژی جەزاکەم؟

که جەرگم کون‌کونه، ئەوچەل لەوێڕا
دەبێ زووخاوی چەند ساڵەم ڕەها کەم

          "ئیمامی" پاشی ئەندامی لە قیس‌چووی
         
دەڵێ هەر گیانه ماوه، با فیدا کەم

 

                                          قاقڵاوا، 1335ی هەتاوی

 

(لاپەڕە ١٣٨ ی چاپی جەعفەر، لە دیوانی چاپی ئەنیسیدا نەهاتووە)


 

دیوانی چاپی ئەنیسی ٣٠ ساڵ دوای گوترانی ئەم شیعرە چاپ بووە و ڕوون نییە بۆچی شیعرەکە  لەوێدا نەهاتووە.

شیعرێکی ساکارە لە سەر کێشی سواری بەحری هەزەج بەڵام ناوەرۆکەکەی شاد و بن بزوێن نییە و بە پێچەوانە گلەیی و بناشتە لە یارانێک کە بە نەیار دەرچوون و لەگەڵ بێگانە جیاوازییان نییە؛ هەروەها لە ناسیاوانێک کە دەڵێن ناتناسین! شاعیر لە شیعرەکەدا باس لە تاڵ و سوێریی هەموو ماوەی ژیانی دەکات و لە جەرگی کون کونی، کە زووخاو دەدەڵێنێت. ئەوە ناوەرۆکی سەرەکی شیعرەکەیە.

ئەو گلەیی و گازندانەی شاعیر لە ژیانی خۆی، هەموو بۆ خوێنەر ڕوون و ئاشکران بەڵام ئەوەی ڕوون نییە یەک شتە و ئەویش لە فەردی کۆتاییدا ئاماژەی پێکراوە: "ئەندامی لەدەست چوو". ئەوە چییە؟ ئەندامێکی لەشی شاعیرە لە عەمەلیاتێکدا دەریان هێناوە یان لە ڕووداوێکدا شکاوە و فەوتاوە؟ یا خود ئەندامێکی بنەماڵەکەیانە وا لەبەر هەر هۆکارێک کۆچی دوایی کردووە و نەماوە؟ ئەوەی بەشوێنیدا دەڵێ با ئەو گیانەی وا ماومە فیدا بکەم، واهەیە ئەگەری دووهەم هەندێک بەهێزتر بکات گەرچی بە قورس و قایمی نایسەلمێنێت.

خوێنەر بە قەرینەی شیعرەکە ناتوانێت ئەو مەتەڵۆکەیە هەڵبێنێت و بزانێت ئەندامی لەدەست چوو چییە یان کێیە؟ خۆزیا کاک جەعفەری کوڕی شاعیر، کە دەبێ ئاگاداری مەسەلەکە بێت، لە پەراوێزی دیوانە چاپکراوەکەدا ئەوەی لە هەموان ڕوون بکردایەتەوە. یان لە دواڕۆژ و لە چاپی دووهەمی دیوانەکەدا ئەو ئەرکە بەڕێوەبەرێت.

 

ئاشنا: ناسیاو

 

یار و نەیار: جیناسی ناتەواون

 

تەوفیر: جیاوازی

 

ڕۆژی جەزا: ڕۆژی قیامەت و لێپرسینەوە

 

ئەوچەل: ئەمجار

 

زووخاو: کێم و خوێنی تێکەڵاو. کێم: زەرداوی برین (هەنبانە بۆرینە)

 

بەحری عەرووزیی شیعرەکە:

هزج مسدس محذوف: مفاعیلن مفاعیلن فعولن

 

www.rojhalat.de / www.bokan.de